HELBURUAK

• Drogen inguruan naturaltasunez mintzatzea.

• Drogei eta drogen zenbait erabilerari buruzko informazioa ematea.

• Arrisku eta kalteak gutxitzeko sentsibilizazio lana egitea.

• Drogen kontsumoari buruz ditugun jokamoldeez gogoeta egitea.

EDUKIAK

• Drogen sailkapena eta definizioa.

• Drogei eta drogen zenbait erabilerari buruzko informazioa erraztu.

• Drogen kontsumo motak: erabilera, abusuak eta menpekotasuna.

• Nola azaltzen ditugu drogekin dauden loturak?

• Drogekiko erlazioaren baldintzatzaileak: pertsona, ingurunea eta substantzia. Oreka/desoreka erlazioak.

LABURPENA

Pertsonak geure jokaerak dauzkagu, baita izateko, erlazionatzeko, inguruko mundua interpretatzeko geure moduak ere. Azken finean, geure bizimodua daukagu, geure bizitzeko estiloa, eta, logikoa denez, bizitzeko modu hau ahalik eta gustukoen eta asegarrien izaten saiatzen gara... “Zoriontsu” izatea bilatzen dugu. Bakoitzak “zoriontasuna” era eta forma ezberdinean lortzen dugu, eta erabiltzen dugun bitartekoen artean, esaterako, drogak daude.

Drogak, berez, objektuak dira eta geuk erabakitzen dugu hauek erabili ala ez. Beraz, drogak beti egon izan dira, badaude eta egongo dira, eta, objektuak diren heinean, haien erabilerak adieraziko du problematikoak diren ala ez, nahiz eta kontsumoak bere arriskua izan beti.
Erabileraren garrantzia dela eta, erabilera eta erlazio ezberdinak ezagutuko ditugu, eta kontsumitu ala ez erabakitzeko faktoreen inguruan hausnartuko dugu (pertsona, ingurunea eta substantzia).

Kontsumoen aurrean garrantzitsua da arduraz jokatzea, baina alarmarik gabe. Bizi dituzten baldintza sozial eta pertsonalekiko ardura eta baita kontsumoak bere garapenean, bere heldutasunean eta autonomian, bere sozializazioan, bere osasunean... duen eraginarekiko ere. Garrantzitsua dena ez da droga legal edo ilegalen bat kontsumitzea, baizik eta kontsumo honek bere bizitzan duen eragina eta kontsumitzeko modua.

PERTSONEKIN NOLA JOKATU?

Pertsonekiko jokabidea oso alor konplexua da, baina, gure esparruan, kudeaketari dagozkion jokaera garrantzitsuenetako batzuk azpimarratuko ditugu:

• Errealismoz aztertu egoera.

• Egoera aztertuta, gatazka-aspektu edo laguntzei buruzko ekintza-plana landuko dugu.

• Jokaera pertsonal ezberdinak hartuko ditugu aintzat, eta komunikaziorako baliabideak azalduko ditugu.