Azken urte hauetan estatu mailan erizainen lan egoera aldatu egin da. Lan baldintzek okerragora jo dute eta azken promozioei egiten zaizkien kontratuak oso epe laburrerako izaten dira. Hori dela eta, erizain askok lan bila atzerrira joatea erabakitzen dute. Portugal, Frantzia, Italia eta Irlanda dira arrakasta handieneko lurraldeak. Horregatik 2001eko uztailean nik Italiara abiatzeko deliberamendua hartu nuen.

Italiako Osasun Sistema gurearen oso antzekoa da, hau da, Osasun Sistema Nazionala. Hala ere hitzartutako zentroen kopurua hemengoa baino askoz altua- goa da.

Bertan ere erizainak diplomatuak dira. Haien espezialitateak desberdinak dira, hemen aurkitu ditzakegunekin konparatuta. Italian “erizain haurtzain”, “higiene ikuskari” eta “gainbegirale”ekin topa gaitezke.

Erizainen taldea gainbegiraleek (caposala), erizainek (infermiera), erizain laguntzaileek (OTA) eta hemen existitzen ez den figura profesional batek (ausiliaria) osatzen dute.

Lan antolakuntzari dagokionez, ondoko hau azpimarra daiteke:

-    Italian ez dute erizain eredurik erabiltzen (marko kontzeptuala), ezta NANDA diagnostikorik ere.

-   Gaixoaren egoerari dagokionez balorazio eskasa egiten da erizaintzaren ikuspuntutik.

-  Ez dute zainketa planik erabiltzen.

-  Gaixoen bilakaerari buruzko balorazioan ez da ia deus esaten.

-  Erizainek ez dute beraien lana gaixo kopuru baten erresponsabilitatean oinarritzen. Dauden zeregin guztien arabera banatzen dute euren egitekoa.

-   Erizainek funtzio gehienak bereganatzen dituzte, ia-ia ez dagoelako erizain laguntzailerik.

-  Askotan lana sistema pribatuaren eraginpean dago, ospitale asko hitzartutakoak baitira.