Osasungoa Euskalduntzeko Erakundea

Osasungoa Euskalduntzeko Erakundea

+34 944 001 133

oee@oeegunea.eus

Lesioak goi mailako futbolean: emakume eta gizonen arteko konparaketa

Egileak:

Jon Larruskain Zabala

Jose Antonio Lekue Gallano

Nerea Diaz Aranguren

Adrian Odriozola Martinez

Susana Maria Gil Orozko

0


Sarrera

Emakume eta gizon futbolariek jasaten dituzten lesioen arteko ezberdintasunak ikertzea beharrezkoa da arrisku-faktoreen inguruko hipotesiak sortzeko eta, horren ondorioz, prebentzio-estrategiak egokitzeko. Hala ere, ikerlan bakar batek aztertu ditu sexu-ezberdintasunak lesioen epidemiologian goi-mailako futbol europarrean.[1]

Helburuak

Goi-mailako emakumezko eta gizonezko futbolariek jasandako lesioen intzidentzia, ezaugarriak eta larritasuna deskribatzea eta konparatzea

Metodoak

Athletic Club futbol taldeko emakumeen eta gizonezkoen lehen taldeetako lesioak, eta entrenamendu zein partiduetako esposizio-denbora, klubeko zerbitzu medikoak erregistratu zituen 5 denboralditan (2010-2015), FIFA-ren argibideak jarraituz.[2] Emakumeen eta gizonen lesioen intzidentziak (lesio kopurua/1.000 ordu) z-testa erabilita konparatu ziren.

Emaitzak

Entrenamenduetako eta partiduetako esposizio-denbora eta partidu-kopurua astero %20-30 handiagoak izan ziren gizonezkoengan (P≤0.02). Entrenamendu eta partiduetako lesioen intzidentzia %30-40 handiagoa izan zen gizonezkoengan (P≤0.04), baina soilik lesio arinen kasuan (1-7 eguneko baja, P<0.01). Intzidentzia handiago hau, gizonezkoengan kontusioak 4.82 aldiz ohikoagoak izatearen ondorioa da (P<0.01), lesio muskularren eta artikularren intzidentzia antzekoa izan baitzen (P≥0.44). Bajan egondako egun-kopuru totala %21 handiagoa izan zen emakumeengan, eta belauneko eta orkatilako lotailuen lesio larrien (>28 eguneko baja) intzidentzia 5.36 aldiz handiagoa (P=0.04). Koadrizepseko lesio muskularrak, aurreko lotailu gurutzatuaren hausturak eta orkatilako sindesmosi lesioak, aldiz, ohikoagoak izan ziren emakumeengan: 2.25 (P=0.01); 4.59 (P=0.06); eta 5.36 (P=0.04), hurrenez hurren. Iskiotibialetako lesio muskularrak eta pubalgiak, ordea, 1.93 (P=0.01) eta 11.10 (P=0.02) aldiz ohikoagoak izan ziren gizonezkoengan. Emakumeengan aurreko lotailu gurutzatuaren hausturek denbora-galera guztiaren %43a eragin zuten. Bestalde, gizonezkoengan iskiotibialetako lesio muskularrak izan ziren denbora-galeraren iturri nagusia (%19).

Ondorioak

Prebentzio arloko esku-hartzeak gizon eta emakume futbolarien beharretara egokitu behar dira. Emakumeen artean aurreko lotailu gurutzatuaren hausturak prebenitzea lehentasuna da baja luzeak eta osasun arloko ondorio kaltegarriak ekiditeko. Gizonezkoen artean, ordea, iskiotibialetako eta iztarteko lesioak ohikoagoak dira. Emakumeen artean ikusitako koadrizepseko eta orkatilako sindesmosiko lesioen maiztasun handiagoa aurkikuntza berria da, sakonago aztertu beharrekoa.

Bibliografia

1. Hagglund M, Walden M, Ekstrand J. Scand J Med Sci Sports 2009, 19, 819-827.
2. Fuller CW, Ekstrand J, Junge A, et al. Br J Sports Med 2006, 40, 193-201.

Azken Berriak

Osasunaldia datorren apirilaren 10ean, osteguna
Ostegunean, apirilaren 10ean, Osasunaldiaren 4. edizioa egingo da hiru lekuetan aldi berean: Leioan, Donostian eta Gasteizen. Hiru lekuak konektatuta egongo dira eta dena jarraitu ahal izango da bakoitzetik. Horrez gain, beste lekuetatik ere ikusi ahal ...
Solasaldia Elgoibarren apirilaren 1ean: Osakidetza eta euskara
"Elgoibarko Udalak eta Elgoibarko Izarra elkarteak ´Euskararen Osasuna Osakidetzan´ izeneko solasaldia antolatu dute Osakidetzaren, Gipuzkoako Foru Aldundiaren eta Eusko Jaurlaritzaren babesarekin.   Ekitaldia apirilaren 1ean, ...

Berri +

Ugarteburu sariak
Egin bazkide
Gizarte-sareak
facebook twitter
Laguntzaileak
Eusko Jaurlaritza
Bai Euskarari

©OEE

Diseinua: Di-Da Garapena: Bitarlan