Udako oporretan Aramaioko ordezko medikuek ez dute euskaraz jakin izan. Horren aurrean, eta hizkuntza eskubideak errespeta daitezela aldarrikatzeko, Aramaioko mediku Aitor Montesek eskaera ofiziala aurkeztu zuen atzo Debagoieneko ospitalean.

Ordezko medikua ere elebiduna izatea da eskatzen dutena. Iaz ere eskaera bera egin zuen Montesek baina e-postaz, Osakidetzako barne-harremanetarako erabiltzen duten e-postaren bidez. Hala ere, iaz ez zioten jaramonik egin, eta Aramaiora joan zen medikuak ez zekien euskaraz. Oraingoan eskaera egiteko modua aldatu arren, Montesek ez daki balio izango duen.

Eskaera herritarrengandik datorrela erakusteko talde argazkia atera zuten ostiralean Bizente Goikoetxea plazan; bertan egon ziren Montes bera eta Udaleko ordezkariak –Ramon Ajuria alkatea barne–, Uemako presidente Maren Belastegi eta Txirritola euskara elkarteko kideak, besteak beste. Alkateak azaldu zuenez, "ordezko medikuarekin euskaraz egiteko aukera eskatzen dugu, ez besterik".

Uemako presidente Maren Belastegik gogoratu zuenez, Aramaioko euskaldun tasa oso altua da, %85ekoa hain zuzen eta, beraz, mediku elebiduna izatea beharrezkoa dela azaldu zuen. Halaber, ekimen hau udalerri euskaldun guztietara zabaltzeko nahia ere adierazi du Belaustegik.