Ordezko medikuen aferak ez du etenik; Zumaian, Tolosan, Muxikan eta beste hainbat herritan gertatu bezala, oraingoan Gipuzkoako beste herri batean sortu da protesta, Azpeitian: lau familia medikuk oporrak hartu dituzte, eta ordezko mediku erdalduna jarri du Osakidetzak.

Horren aurrean, Azpeitiko Natul euskara taldeak kezka eta haserrea agertu du, eta kontratuak berrikusteko eta arazoari konponbidea emateko eskaera egin die Osakidetzako arduradunei. Euskara elkarteari kezkagarria iruditzen zaio Osakidetzaren erabakia, ez dituelako kontuan hartu Azpeitiko herritarrak, ezta bertako errealitate soziolinguistikoa ere. Gaineratu dutenez, hainbat herritarrek gaztelaniaz komunikatzeko zailtasunak dituzte, eta pertsona horientzako «zailtasun nabarmena» eragingo du egoera honek, eta «osasun zerbitzuaren kalitatean eragin zuzena» izango du.

Azpeitiko Udalak bat egin du Natul euskara taldeak egindako salaketarekin, eta Osakidetzako arduradunekin bilduko da Azpeitiko herritarren hizkuntza eskubideak errespetatu ditzaten eskatzeko. Beraien esanetan, udan ez ezik, urte osoan zehar eskaintzen dira erdara hutsez hainbat zerbitzu Azpeitiko osasun etxean, eta Azpeitiko Udalak da arazo horri konponbide iraunkorra eman nahi dio. Bide horretan, Osakidetzarekin elkarlanean aritzeko borondatea agertu du Azpeitiko Udalak.