Iturria: Berria.eus

Iñigo Jaca Arrizabalaga jaunak komunikabide batean baino gehiagotan aipatu du Osakidetzan sendagile espezialista elebidunen talde bat behar dela, eta horri dagokionez, garbi utzi nahiko nuke Osakidetza neurri zehatzak ezartzen ari dela hori berandu baino lehen posible izan dadin. Osasun Sailaren apustua, Osakidetzaren barruan euskara arloari dagokionez, garbia eta agerikoa da: legegintzaldiko lehenengo urtean, Euskararen Erabilera Normalizatzeko Plana onartu dugu, eta lehenengo aldiz, orain arte inoiz garatu ez diren neurri batzuk ezarri ditugu; Jaca jauna, nolabaiteko ardura-karguak izanda, sistemaren parte zenean ere garatu gabekoak, hain zuzen. Sarean honekin lotuta dauden ezagutzei balioa ematen eta agerian uzten ahalegintzen ari gara, gure pazienteen eta euskal gizarte osoaren zerbitzura jartzeko, oraintxe bertan!

Denok dakigu Osakidetzan egiten dugun arreta-lana, nagusiki, ahozko komunikazioan oinarritzen dela. Horregatik, 2013an onartu genuen Planaren barruan, neurri jakin batzuk zabaltzen, haien erritmoa bizkortzen eta hedapena handitzen saiatu gara. Adibidez, 2015ean, erabiltzaileen lehentasunezko hizkuntza erregistratzen hasiko gara. Hala nahi duten bezeroen kasuan hasiko gara aipatutako datua erregistratzen. Halaber, erabiltzaileek euskarazko arreta zein unitate edo zerbitzutan jaso dezaketen aldez aurretik jakin dezaten ahalegin berezia egingo dugu, euskarazko ahozko komunikazioak ahalbidetzeko helburuarekin.

Arreta Espezializatu elebidunari dagokionez, Osakidetzako Euskararen Erabilera Normalizatzeko 2. Planean, hitzez hitz, bi ataletan, zera jasota dagoela gogorarazi nahi nuke:

«Ospitaleetako Arreta Espezializatuaren kasuan, hainbat espezialista elebidun partaide direla, pixkanaka euskarazko arreta ziurtatuko duen espezialitate-eskaintza bat osatzen eta zabaltzen joango da, herritarrei euskarazko arreta-zirkuitu osoa eskaintzera iristeko asmoz. Plangintzaren lehenengo sei hilabeteetan, ospitaleek euskarazko arreta zein espezialitatetan bermatzen hasiko diren zehaztu eta ezagutarazi beharko dute, eta geroago, urtez urte, eskaintza zabaldu beharko dute, espezialitate bakoitzaren zabalpena eta eskaera kontuan hartuta, zirkuituan ahal den alor kopuru handiena barne hartzeraino. Arreta espezializatu elebidunaren eskaintza honen jarraipena eta ebaluazioa hala Euskara Plan honetako bi ebaluazioen nola urteko Programa Kontratuaren bitartez egingo da».

Aipatutako Programa Kontratuan, kudeaketari dagokion atalean, erakunde bakoitzak baloratuko du, bai kualitatiboki bai kuantitatiboki, Lehen Mailako Arretaren eta Espezializatuaren artean arreta-zirkuitu eledun bat eskainiko duen.

Azken finean, berriz esango dut, Osakidetzan euskararen erabilera normalizatzearen aldeko gure apustua sendoa da eta egitateek horixe frogatzen dute.