16. Osasun Jardunaldiak: Gaixotasun Kardiobaskularrak
WOLFF PARKINSON WHITE SINDROMEA BIDE ANOMALOAREN ABLAZIOA
Egileak: P Aierbe , MF Arkotxa , J Ormaetxe , P Grande , J Mtz. Alday , V Montero , A Andrés , G Bastos
Basurtuko Ospitalea. Kardiologia Zerbitzua. Elektrofisiologia Saila
Sarrera
SARRERA Aurre-kitzikapena (preeszitazioa): bentrikulu-masa osoaren edo zati baten kitzikapen aurreratua, hau da, eroapen-sistema normalean zehar kitzikatuko balitz legokiokeen epean baino lehenago gertatua. Bentrikulu-kitzikapena aurreratu egiten da (kitzikapen goiztiarra). Sindromearen arduradunak eroapen-bide anomaloak (bide akzesorioak, BA) dira. Ondorioak: takikardia ortodromikoak, takikardia antidromikoak, flutter eta fibrilazio aurikularra eta fibrilazio bentrikularra (bat-bateko heriotza, kasuen % 0,01 urtero).Helburuak
HELBURUAK Gaixo sintomatikoengan, aukerako tratamendua bide akzesorioaren ablazioa da, irrati-frekuentziaren bidez. Bide akzesorioak eraztun aurikulu-bentrikular bien inguruan kokatzen dira eta izan daitezke: trenkadakoak (trenkada-aurrekoak, trenkada-erdikoak eta trenkada-atzekoak) eta horma askeko bide anomaloak (ezkerrekoak zein eskuinekoak). Delta uhinaren morfologiak lagun dezake kokapena argitzen. Teknika honekiko gure laborategiak duen eskarmentua azaldu nahi dugu, 1992. urtetik 2004. urtera bitartean W-P-W sindromea (delta uhina eta takikardia sintomatikoak) agertzen zuten 318 gaixori aplikatutako ablazioaren teknikaren zailtasunak eta emaitzak jakinarazteko.Metodoak
METODOA Bihotz-kateterismoaren bidez, kateter batzuk sartzen dira bide femoraletik, eroate-sistemaren eta bide anomaloen jarduera elektrikoa erregistratzeko. Bide anomaloaren kokapenaren arabera (eraztun mitral edo trikuspideoan), arteria femorala edo zain femorala aukeratzen da. Bide akzesorioaren potentzialak bilatzen dira eta, toki egokia atzematen denean, irrati-frekuentzia motako energia jartzen zaio, zeinak, eraginkorra baldin bada, EKG normaltzen duen, delta uhina desagertuta eta PR tartea normalduta.Emaitzak
EMAITZAK Arrakasta orokorra: 287/318 = % 90 Bide anomaloaren arabera: Ezkerreko alboko bideak % 93, eskuineko alboko bideak % 89, trenkada-aurreko bideak % 90, trenkada-erdiko bideak % 89, eskuineko trenkada-atzekoak % 96, ezkerreko trenkada-atzekoak % 91. Konplikazioak: 5/318 = % 1,5 Hauexek izan ziren: Hematoma bat lepoan (kirurgia), blokeo A-B oso bat (PM behar zuen), iztai-hematoma bat, bihotz-buxadura bat, eta de Dressler-en sindrome bat.Ondorioak
ONDORIOAK W-P-W sindromearen bide anomaloaren ablazioa aukerako teknika da gaixo sintomatikoentzat eta arriskuko lanbidea dutenentzat.Azken Berriak
Hitzez hitz, etorkizuna berreraiki
Euskaraldia datorren hilabetean izango da eta Debabarreneko Osakidetzako osasun-zentro eta ospitaleetan ekintza ugari antolatu dituzte Debabarreneko ESIko Euskara Batzordeko boluntarioek. Langileak izen-ematera animatzeko, adibidez, soilik ESI...
Osagaiz aldizkariaren zenbaki berria sarean dago
Osagaiz osasun-zientzien aldizkariaren zenbaki berria sarean dagoela jakinarazi nahi dizuegu. OEE-Osasungoa Euskalduntzeko Erakundeak eta UEU-Udako Euskal Unibertsitateak egindako argitalpenean, medikuntzari buruzko denetariko artikuluak aurkituko ...
