18. Osasun Jardunaldiak: Infekzioak
4.3 Hemokultiboetan isolatutako bakterioak mendaroko ospitalean 2007an
Egileak: Joxe Mari Manterola Martija, Jose Luis Diaz de Tuesta del Arco, Jorge Taboada Gomez, Isabel Barrio Camara
Mendaroko Ospitalea
Sarrera
SARRERA Ospitale txikietan aurkitzen ditugun emaitzek askotan argi eta garbi uzten dute agerian zein infekzio mota izaten duten eskualdeko biztanleek.
Helburuak
HELBURUAK Jakin eta aztertu zein bakterio espezie aurkitu den Mendaroko ospitalean 2007. urtean zehar hemokultibo positiboetan.
Metodoak
METODOAK Debabarrena eskualdean, Ermuan eta Mutrikun 75.000 pertsona inguru bizi dira. 2007. urtean zehar aurkitu diren hemokultibo positiboak aztertu dira eta ondoren hemokultibo positiboak dituzten pertsonen historia klinikoak. Emaitzen analisi estatistikoa SPSS bidez egin da.
Emaitzak
EMAITZAK Urtean zehar 119 pertsonek hemokultibo positiboak izan dituzte (tasa 159/100.000 biztanle), 62 gizonezkoak eta 57 emakumezkoak eta 8 umeak eta 111 (% 93) helduak izanik. Pertsonen adinaren batez bestekoa 75 urtekoa izan da. Ehuneko 86 bakteriemiak komunitatean hartuak izan dira eta % 14 ospitalean (gnosokomialak). Isolatutako bakterioak honako hauek izan dira: 42 Escherichia coli, 24 Streptococcus pneumoniae, 18 Staphylococcus aureus, 6 Streptococcus agalactiae, 6 Enterococcus faecalis, 3 Streptococcus pyogenes, 3 Staphylococcus epidermidis, 3 Pseudomonas aeruginosa, 3 Streptococcus “viridans”, 2 Neisseria meningitidis, 2 Klebsiella, eta beste 10. Ez da Brucella-rik aurkitu. Sei (% 33) S.aureus metizilinari erresistenteak ziren, eta E.coli batek (% 2.4) espektro zabaleko beta-laktamasak zituen. Hemokultibo positiboen infekzio-fokuak hauek izan dira: gernu infekzioa eta pielonefritisa (31 aldiz), pneumonia (28 kasu), abdominala eta kolangitisa (16 kasu), endokarditisa (7 kasu), foku ezagutu gabeak (16 aldiz), larruazalekoa (8 kasu) eta beste fokuak (13 kasu). Gernuko, abdominal eta kolangitis infekzioetan E.coli izan da sarriago aurkitu den bakterioa, S.pneumoniae pneumonietan, estreptokokoak eta enterokokoak endokarditisetan eta S.aureus kateterrak bakteriemiaren foku izan direnean. S.pneumoniae izan da gehien isolatu den bakterioa abenduan, urtarrilean eta otsailean eta 50 urte baino gutxiago duten pertsonengan eta E.coli sarriena beste kasu guztietan.
Ondorioak
ONDORIOAK E.coli (% 35), S.pneumoniae (% 20) eta S.aureus (% 15) izan dira hemokultiboetan gehien isolatu diren bakterioak eta gernuko infekzioak nahiz pneumoniak fokurik sarrienak.
Azken Berriak
Donostia Ospitalean ere ospatuko dute Euskararen Eguna
OEEren Osasun Biltzarraren hitzaldia ikusgai
