18. Osasun Jardunaldiak: Infekzioak
5.7. Haemophilus influenzae-k sorturiko sepsia esfenoide hezurraren sinusitisa izan duen gaixo batengan
Egileak: Izaskun Sarriugarte Mochales, Maria Jose Muñoz Muñoz, Eva Maria Lopez Rodriguez, Zuriñe Perea Rielo
Debagoienako Ospitalea
Sarrera
SARRERA Gure ospitaleko larrialdi zerbitzuan ikusitako kasu bat aurkeztu behar dugu. Inolako aurrekari pertsonal esanguratsurik gabeko 58 urteko emakumea daukagu. Bi lokietara hedatzen zen lepoko min bizia, belarriko mina eta sukarragatik joan zen bere medikuarengana. Otitis moduan diagnostikatzen zen tratamendu antibiotikoa, HKEE (hanturaren kontrako ez esteroidea) ipiniz. Gauerako hobekuntzarik nabaritzen ez zuenez larrialdi zerbitzura etorri zen. Analisiak, OTA (ordenagailuaren bidezko tomografia axiala) eta ziztada lunbarra egin zizkioten eta hauen emaitza normalak kontuan harturik tratamendu berberarekin utzi zuten. Handik egun batzuetara berriz ere larrialdi zerbitzura etorri zen ondoeza eta sukarrarekin jarraitzen zuelako eta honi ikusmen arazoak gehitu zitzaizkion: eskotoma zentrala ezkerreko begian eta ikusmen zirriborrotsua eskumakoan. Gure ospitaleko oftalmologoak aztertu ondoren ezer berezirik aurkitu ez zuenez, gaixoa Txagorritxu ospitalera bidali zuten Neurologia zerbitzuak aztertzeko.
Helburuak
HELBURUAK Kasu hau aurkeztu nahi izan dugu interesgarria iruditu zaigulako, bere maiztasun txikia eta azken diagnostikora heltzeko izan genuen zailtasunagatik.
Metodoak
METODOAK Gaixoaren jarraipena egin dugu nahiz eta beste ospitale batera bidali zuten bertan aztertua izateko. Alta ondorengo jarraipena gure ospitaleko ORL-ko kontsultetan burutu zuten.
Emaitzak
EMAITZAK Txagorritxu ospitalean zenbait froga egin zitzaizkion, Neurologia eta Oftalmologia zerbitzuek aztertu zutelarik. Azken diagnostikoa buruko EMN (erresonantzia magnetiko nuklear) eta OTAk eman zuten: esfenoide hezurraren sinusitisaren ondorioz haemophilus influenzae-k sorturiko sepsia, kiasma optikoaren erasanarekin.
Ondorioak
ONDORIOAK Askotan hasieratik diagnostiko zuzenera heltzea zaila da, ez klinikak ezta froga osagarriek ere ezer berezirik esaten ez digutelako. Horregatik oso garrantzitsua da gaixoaren jarraipen estu bat egitea, klinikan aldaketarik balego berriz ere aztertua izateko. Hala ere, argi daukagu larrialdi zerbitzu batean hau oso zaila dela.
Azken Berriak
Donostia Ospitalean ere ospatuko dute Euskararen Eguna
OEEren Osasun Biltzarraren hitzaldia ikusgai
