Sarrera

65 urteko gizonezkoa 2008ko otsailaren 27an kirurgia orokorreko zerbitzuan ingresatu da oinarri zefalikoa duen pankreatitis akutu edematosoa diagnosiarekin. Bere aurrekari pertsonal bakarra HTA da. Otsailaren 29an, nutrizio parenteralarekin hasteko eskuineko besoan Drum motako bide zentrala kanalizatzen da. Toraxeko erradiografia egin ostean, nutrizioarekin hasten da. Martxoaren 3an, txertatutako gunean flebitisa duela ohartzen da erizaina. Berehala kateterra kendu eta punta kultibatzera bidaltzen da. Hurrengo orduetan besoak okerrera egiten du, flebitisa zelulitis bilakatuz. Martxoaren 7an bere egoera orokorra okerrera doa eta kontzientzia mailaren depresioa du. Sabeleko OTA eta besoko ekografia egin eta ebakuntza gelara eramaten dute eskuin besoko zelulitisa drainatzeko. Ondoren, ZIUra bideratzen da sepsia duelako, intubazio orotrakeala, sedazioa, inotropo eta antibiotikoekin. Bertan, egindako kultiboen emaitzak positiboak dira S. aureus-arentzat. Eboluzioa ona da eta martxoaren 14an infekziosoen unitatera lekualdatzen da. Apirilaren 2an, berriz ere ebakuntza gelara itzultzen da, ertzen garbiketa eta granulazio ehunen erauzketa egitera. Ondorengo egunetan konplikazio batzuk izaten ditu, hala nola, odoljarioa. Apirilaren 25ean ospitaleko alta jasotzen du eta ondorengo sendaketak osasun-zentrora bideratzen dira.