20. Osasun Jardunaldiak: Emakumeak eta Osasuna
5.0 9-Fitz-Hugh-Curtis-en sindromea. Kasu baten laburpena
Egileak: Sara Estrada , Irati Etxaburu , Ainhoa Unzurrunzaga , Edelweis Aldasoro , Alazne Larrinaga , Esther Martinez
Barne Medikuntza Zerbitzua. Medikuak. Galdakao-Usansolo Ospitalea
Helburuak
Fitz-Hugh-Curtis sindromearekin erlazionaturiko kasu baten aurkezpena.
Metodoak
Historia klinikoa eta diagnostikoarekin erlazionaturiko bibliografia eta datu baseen berrikusketa.
Emaitzak
Kasu klinikoa 25 urteko emakumea Gaixotasun Infekziosoen Zerbitzuan ingresatu zuten goragalea, sukarra eta eskuin hipokondrioko minarekin. Aurrekari pertsonalen artean, erretzailea, gernu infekzio anitz eta pilula antisorgailuak hartzen zituen. Miaketa fisikoan, sabeleko ukipen sakonean mina eskuineko hipokondrioan (Murphy +) eta sukarra (38.6ºC) azaltzen zituen. Analitikan PCR 74 mg/L, 15.000 leukozito/mm3 ( %80S, L). Transaminasak normalak. Sabeleko ekografian eskumako giltzurrunean kiste arrunta ikusten zen. Eskanerrean likido askea eta edema porta inguruan. Mina gero eta handiagoa zen nahiz eta analgesikoen dosia igo. Egonaldiaren 8.egunean leukorrea sumatu zuen . Lagin azterketan C. trachomatis antigenoa zalantzatsua zen, IgG antigorputzak 256 (N 0-64). Hala ere, doxiziklina eta klindamizina jarri genion. Kontsultarako kontrol baten zain etxera joan zen. 5 egun beranduago Barne Medikuntzako Zerbitzuan ingresatu zuten sabeleko min jasanezinarekin. Analitika antzekoa zen. Gibel erresonantzian perihepatitisa ikusi zuten. Serologian C. trachomatis-en IgG antigorputzak 2048ko titulua erakutsi zuen, serokonbertsioarekin bateragarri. Mina kontrolatzeko tratamenduari kortikoideak gehitu genizkion baina ez zuen erantzunik izan . Gaur egun, ebakuntza epearen zain dabil. Eztabaida Fitz-Hugh-Curtis Sindromea Chlamydia eta gonokoko infekzio baten ostean agertzen den perihepatitisa da. Sabeleko horma eta gibel artean traktu haritsuak sortzen dira, ¨biolin korden¨ antzekoak. Gaixotasun Pelbiko Inflamatorioen ( GPI) % 4-27 kasutan agertzen da. Sabeleko mina emanez agertzen da, ezaugarri pleuritikoekin. Tratamenduan antibiotikoak ( metronidazol + lebofloxazino edo doxiziklina + klindamizina), analgesikoak, kortikoideak eta azkenengo kasuan, kirurgia izaten dira.
Ondorioak
Sabeleko minaren diagnostiko ezberdinen artean aztertu beharreko entitatea da. Ez dira beti GPI-arekin erlazionaturiko sintomak agertzen.
Azken Berriak
Sarean dira "Osatuberri" aldizkariko irakurgai berriak
Donostia Ospitalean ere ospatuko dute Euskararen Eguna
