21. Osasun Jardunaldiak: Ikerkuntza: ezagutzatik ekintzara
Artroskopiaren zeregina aldakako protesi mingarrian
Egileak: Sara Lizeaga Lopez de Guereñu, Irene Corcuera Elosegui, Aritz Lizundia Izagirre, Iñaki Aginaga Badiola, Ricardo Cuellar Gutierrez, Jaime Usabiaga Zarranz
Donostia Ospitalea - Traumatologia Zerbitzua
Sarrera
Gaur egungo gizartean, alde batetik jendearen bizi itxaropenaren luzatzeak, eta, bestetik, teknika berrien aurrerakuntzak eraginda, geroz eta protesi gehiago jartzen dira gure ospitaleetan. Kontuan izan behar dugu baina, ebakuntza guztiek beren arriskua dutela, eta protesien ondorioz konplikazioak gerta daitezkeela. Aldakako protesi bat jartzen dugunean, berau mingarria izatearen eragileak oso ugariak izan daitezke, eta min honi modu eraginkorrean aurre egin ahal izateko, minaren eragilea ezagutzea ezinbestekoa dugu. Honetarako, baliabide arruntez gain (historia klinikoa, azterketa fisikoa, ....), gaur egun, tresna berri bat dugu esku artean: ARTROSKOPIA. Honen hastapenak belaun artroskopiarekin alderatuz egin ziren, eta hasiera batean, prozedura errazetan erabiliaz. Hasiera hauei esker eta teknika berrien hobekuntzari, noski, gaur egun aplikazio ugaritarako erabil dezakegu artroskopia. Honen bidez, minaren eragilea ezagutu dezakegu, gainontzeko frogak negatiboak izan diren paziente baten aurrean, eta zenbait kasutan, ebakuntza berean tratamendu egokia ere egin dezakegu. Honela, ebakuntza oldarkorragoa ekiditen diogu pazienteari, honek dakartzan onurekin.Metodoak
Lan honetan egin duguna zera da; azken urteetan gure ospitalean egin diren aldakako artroskopien datuak bildu, eta egin diren diagnostiko desberdinak alderatu. Aldi berean, kirurgiaren momentu berean egin ahal izan diren ekintza terapeutikoak ere aztertu dira.Emaitzak
Aztertutako sei kasuen artean honakoak izan dira diagnostikorik ohikoenak: psoas muskuluaren tendinitisa eta artrofibrosia. Honako arazoei momentuan eman zaie irtenbidea, artroskopiaren eraginkortasunaren adierazle. Azken kasu batean luxazio bat izan zen diagnostikoa eta honetan ere, kapsularen konponketa egin ahal izan zen arazoari irtenbidea emanez.Ondorioak
Aldakako protesi mingarri baten aurrean edota minaren eragile zehatzik ez dakigunean, artroskopia aukera ona izan daiteke, bere eraginkortasun diagnostiko eta terapeutikoagatik. Bestalde, berrebakuntza agresiboagoetara jo beharrik ez dugulako. Hala eta guztiz ere, nahiko gai berria da. Hau dela eta, etorkizunean azterketa gehiago beharko direla ondorioztatzen dugu.Azken Berriak
XVII. Pediatria Topaketak: matrikula egin eta komunikazioak bidaltzeko epea zabalik
Apirilaren 3an XVII. Pediatria Topaketak izango dira Eibarren. Adituen hitzaldi batzuk egongo dira, interesezko gaien inguruan. Gero, elkarrekin aisialdi-tarte bat izan ostean, bertaratutako pediatra eta erizainek beraien lan eta ikerketak aurkezteko au...
Osasungintza euskalduntzearen aldeko atxikimendu-bilketa abiatu dute
"Euskal Herri osasuntsu eta berdinzaleago baten osaketarako ezinbesteko tresna da osasungintza publikoa, duina eta kalitatezkoa. Eta kalitatezkoa izango bada, euskalduna izan beharko da", diote EHE-Euskal Herrian Euskarazek eta Aintzat osasung...
