Helburuak

Helburu nagusia gure gaixoek klopidogrelen preskripzio egokiak dituzten aztertzea izan da. Honekin batera preskripzio horien arrazoiak aztertu ditugu. Bukatzeko klopidogrelen erabilera okerrak suposatzen duen gehiegizko gastuaren kalkulua egin dugu.

Metodoak

Ikerlan deskribatzaile behatzailea da. Erabilitako laginean 2010eko irailaren 28an Arrasateko osasun zentroko 14 urtetik gorako eta klopidogrelen preskripzio aktibo eta kronikoa duten gaixo guztiak sartu dira. Sexu (gizon/emakume) eta adinaren arabera (14-64 urte/65-74 urte/>=75 urte) sailkatu eta preskripzioaren egokitzapena aurrez zehaztutako baldintza batzuen arabera zuzen edo oker gisa banatu da. Informazioa lortzeko Osabide, Clinic eta Global baliabide elektronikoak erabili ditugu.

Emaitzak

Aztertutako populazioaren % 0,86ak klopidogrel hartzen du, gizonezkoek emakumezkoen preskripzioak hirukoizten dituztelarik. Adin talde guztietan gizonezkoak gehiago izan arren, 75 urtez gorako taldean emakumezkoen preskripzioetan gorakada nabarmentzen da. Tratamenduaren egokitzapenari dagokionez % 54,5ak modu zuzenean hartzen du botika eta %73,55ak gaixotasun arterial periferikoagatik egiten du. Gaixoen % 45,5ri aldiz, klopidogrel-a modu okerrean agintzen diogu eta kasuen hiru laurdenetan ezarritako denbora gainditzen dutelako da.

Ondorioak

Klopidogrela kasu gehiegitan modu okerrean agintzen dugu, edo hobeki esanda, ez dugu behar denean kentzen. Bestalde ikerlan gehiago beharrezkoak izango dira zenbait azalpen argitu eta zehazteko. Klopidogrelen erabilera okerrak gure osasun sistema publikoari suposatzen dion gastu ekonomikoa kontutan hartu beharrekoa bada ere, guk sendagile gisa guzti honek gaixoen osasunarengan sor ditzakeen kalteak aintzat hartu beharko genituzke.