22. Osasun Biltzarra: Osasun-langileon erronka berriak
5.3. BBKG duten pazienteen eboluzioa aurresateko ereduetan aldagai jarraikien kategorizaziorik hoberena aurkitzeko metodoen garapena
Egileak: Irantzu Barrio Beraza, Inmaculada Arostegui Madariaga, Jose Maria Quintana Lopez, Cristobal Esteban Gonzalez, Susana Garcia Gutierrez
Osakidetza. Galdakao-Usansolo Ospitalea eta EHU.
Sarrera
Biriketako butxadura kronikoaren gaixotasuna (BBKG) duten gaixoen ikerketa egiten denean, bildutako hainbat aldagai garrantzitsu aldagai jarraikiak dira. Ordea, bai interpretazio klinikoaren ikuspuntutik zein aurresateko ereduen garapen egokirako desiragarria izaten da aldagai jarraiki hauek kategorizatzea.Helburuak
Lan honen helburu nagusia arteriako odoleko gas parametroen kategorizazioa proposatzea da, mozketa puntu irmoak aukeratuz eta, ondorioz, pazienteen eboluzioa aurresateko eredu tinkoa garatzea, aurrerantzean ospitaletako larrialdi zerbitzuetan inplementatzeko.Metodoak
BBKGren kohorte prospektibo baten ikerketan, 16 ospitaletako larrialdi zerbitzuetan BBKG zuten 2.877 gaixo bildu ziren. Ikerketa honetan kontuan hartzen den erantzuna eboluzio txarra da, hain zuzen, heriotza, aireztapen mekaniko edo intubazioaren beharra, arnas- eta bihotz- gelditzea, ZIUn edo AZIUn egonaldia izatea. pH eta PCO2 aldagai askeen eta eboluzio txarraren arteko erlazioa irudikatzen da grafikoki Eredu Orokor Gehigarriak erabiliz. Adierazpen grafikoaren ardatz bertikalak aldagai askeak eboluzio txarrean duen eragina adierazten du: 0 arrisku-gabea; 0 gainetik arrisku handia eta 0 azpitik arrisku gutxi. Gure proposamena arrisku eza dagoenerako kategoria bat sortzean datza, 0ren inguruan konfiantza tarte bat sortuz, eta beste bi kategoria arrisku gehiago edo arrisku gutxiago adierazten dutenak. Are gehiago, aldagai askearen eta eboluzio txarraren arteko erlazioa nabarmenki hazten baldin bada punturen baten, azken puntu hau arrisku gehiago eta askoz arrisku gehiago, edo arrisku gutxiago eta askoz arrisku gutxiago, kategoriak banatzen dituen mozketa puntu gehigarritzat hartuko dugu.Emaitzak
Eboluzio txarra eta aldagai askeen arteko erlazioa, hala nola ebaki puntuak, grafikoan erakusten da. PCO2 aldagai askea klinikoki balioztatutako 4 kategoriatan banandu zen <=45; (45-55]; (55-65); >65 eta pHa berriz hiru kategorietan <=7.26; (7.26-7.35]; >7.35. PCO2 eta pH eboluzio txarraren aldagai aurresale bezala erabili zirenean lortutako AUCak 0,81 eta 0,73 izan ziren hurrenez hurren.Ondorioak
BBKGren ikerketako aldagaiak kategorizatzeko proposaturiko metodoak klinikoki balioetsitako mozketa puntuak eskaintzen dizkigu, hala nola eboluzio txarra aurresateko oso abilezia ona duten aldagai kategoriko berriak eskaintzen dizkigu. Finantzaketa: GIU10/21Azken Berriak
Ikergazte2025 kongresurako artikuluak bidaltzeko epea urtarrilaren 20an zabalduko dute
UEU-Udako Euskal Unibertsitateak aktolatuta, maiatzaren 28, 29 eta 30ean Bilbon egingo dute Ikergazte2025 diziplinarteko kongresua. Bere helburuak euskal ikertzaile gazteak elkar ezagutzea, goi mailako ikerketa euskaraz egiten dela erakustea, eta ikerke...
Ruben Garcia pediatra euskaltzalea gogoan
"Osatuberri" Osakidetzako euskara-aldizkariaren 74. zenbakia (2024ko azaroa-abendua) kalean da jada. Ale berri honetan, Ruben Garcia Perez Bilboko Txurdinagako Osasun Zentroko pediatra eta OEEko kidea zena gogoratu dute. Joan den azaroan zendu...
