23. Osasun Biltzarra: Haurtzarotik Gaztarora...
5.7 Donostia Unibertsitate Ospitaleko Ebakidura Anitzeko Eskanerrean (MSCT) azterketa pediatrikotan Diagnostiko Erreferentzi Mailak ezartzea
Egileak: Rafael1 Larretxea Etxarri, Unai1 Iriondo Igerabide, Amaia2 Masso Odriozola, MariaTeresa2 Alonso Espinaco
1 Donostia Unibertsitate Ospitalea (DUO)-Osakidetza, Erradiofisika eta Erradiobabesa Zerbitzua. Donostia, 2 Donostia Unibertsitate Ospitalea (DUO)-Osakidetza, Erradiodiagnostiko Zerbitzua. Donostia
5.7 Donostia Unibertsitate Ospitaleko Ebakidura Anitzeko Eskanerrean (MSCT) azterketa pediatrikotan Diagnostiko Erreferentzi Mailak ezartzea
Sarrera
Azken urte hauetan Ordenagailu Bidezko Tomografo-en (OBT) erabilpena Erradiodiagnostiko zerbitzuetan izugarri hazi da eta gaur egun diagnostikoan ezinbesteko tresna bihurtu da. Bestalde ekipo hauek igortzen duten erradiazio dosia da arazo nagusia, batez ere gaixo pediatrikoen kasuan.
Hau dela eta nazioarteko hainbat erakundeek proposatu dute erradiodiagnostiko azterketetan erreferentzi dosiak ezartzeko beharra.
Helburuak
DUO-ko Erradiodiagnostiko Zerbitzuan OBT (CT) azterketa pediatrikoetan ematen diren dosien erreferentzi mailak (DRL) finkatzea.
Metodoak
IMPAX sareko aplikazioaren bidez Ospitaleko OBT4 gelan haurren eskaner- azterketetan ematen diren dosiak bildu dira. Horretarako maizen egiten diren bi azterketa aukeratu dira, hau da kraneoa/garuna bata eta bularra/toraxa bestea. Urtebeteko epean (2012) makinak ematen dituen CTDIvol (mGy) eta DLP (mGy•cm) baloreak jaso dira, neurketak haurren adinen arabera sailkatuz eta adin-tarte bakoitzean gutxienez 12 gaixo aukeratuz. DRL baloreak finkatzeko %75 pertzentila erabili da.
Emaitzak
120 neurketa bildu dira eta emaitzak nazioarteko baloreekin alderatu dira.
OBT eskanerra MSCT 64 ebakidura motakoa da eta aurretik Erradiofisika Zerbitzuak egiaztatu du monitorean azaltzen diren CTDI-DLP baloreak eta ionizazio-kamara baten bidez neurtutako adierazleak bat datozela.
Proposatzen diren DRL baloreak, CTDIvol eta DLP erabiliz, kraneo-azterketan 15/ 20/ 25 mGy dira (0-1, 5 eta 10 urte bitartekoak hurrenez hurren) eta 200/ 250/ 400 mGy•cm (aipatutako hiru adin tarteetan). Torax-azterketaren baloreak 3/ 6/ 10 mGy eta 40/ 80/ 160 mGy•cm izango dira.
Lortutako baloreak nazioarte-mailan onartuta dauden erreferentzi baloreen azpitik daude.
Ondorioak
Donostia Unibertsitate Ospitalean OBT azterketetan ematen diren dosiak hobetzeko baliagarriak izango diren erreferentzi mailak azaltzen dira, jakinik balore hauek ez direla mugak baizik eta praktika on baten adierazleak.
Azken Berriak
OEEren Osasun Biltzarraren ahozko komunikazioen aurkezpenak ikusgai
OEEren Osasun Biltzarraren bigarren mahai-ingurua ikusgai
