25. Osasun Biltzarra: Osasuna eta Kirola
5.14 Maila desberdineko 10-14 urte bitarteko futbolari gazteen ezaugarri antropometrikoak
Egileak: JAIME ZUBERO LINAZA, IRAIA BIDAURRAZAGA , JOSE ANTONIO LEKUE , SUSANA MARIA GIL OROZKO
0
Maila desberdineko 10-14 urte bitarteko futbolari gazteen ezaugarri antropometrikoak
Sarrera
Azkenaldian futbol jokalariak elitean adin txikitan hasten dira. Hori dela eta, klub profesionalentzat hauen ezaugarri antropometrikoak zeintzuk diren ezagutzea garrantzitsu bihurtu da (1).
Helburuak
Eliteko futbol jokalari gazteen ezaugarri antropometrikoak populazio orokorrarekin eta beste mailetako futbolariekin alderatzea
Metodoak
10-14 urteko 528 mutilek parte hartu zuten lau taldetan banatuta: populazio orokorra (Eskolak, n=153); elitekoak ez zirenen taldea (CD Galdakao eta CD Ugao, n=92); azpi-eliteko taldea (Athletic Club Fundazioko Ibaizabal-Nerbioi gunea, n=138) eta eliteko taldea (Athletic Club-, n=145). ISAK-en (International Society for the Advancement of Kineanthropometry) protokoloari jarraituz pisua, altuera eta gantz-edukia eta somatotipoa kalkulatu ziren. Gurutzetako Ospitaleko Etika Batzordeak ikerketa hau onartu zuen. Taldeak konparatzeko efektuaren tamaina erabili zen (2).
Emaitzak
Eliteko jokalariak gainontzekoak baino altuagoak ziren (d= 0.30 - 1.18). Adin gazteetan elitekoak gainontzekoak baino arinagoak ziren, baina nagusitzean pisutsuago bihurtu ziren (d= 0.28 - 0.87). Era berean, eliteko jokalariek beste taldeetakoek baino gantz-eduki txikiagoa zuten, tolestura-neurrietan (d= 0.50 - 0.84) eta gantz portzentajean ere (d= 0.24 - 1.35); aldiz, populazio orokorrak eta talde lokaletako jokalariek beste bi taldeek baino gantz-eduki handiagoa zuten. Eliteko eta azpi-eliteko jokalariek endormorfia maila txikiagoak zituzten (d= 0.21 - 0.93).
Ondorioak
Tamaina handia izatea maila altuan jolasteko ezaugarrietako bat zela ikusi zen; are gehiago, nagusitu heinean jokalarien tamainak garrantzi handiagoa zuen.
Gantz-kantitate txikia izatea maila altuan jolasteko ezaugarri garrantzitsua zen.
Populazio orokorraren eta elitekoak ez zirenen gantz-kantitatea antzekoa izateak iradokitzen du astero futbol entrenamendua burutzea ez omen dela nahikoa gantz-edukia txikitzeko; alegia, entrenamendu espezifikoagoa eta intentsuagoa beharrezkoa dela.
Bibliografia
1. Vaeyens, R., Lenoir, M., Williams, A.M., & Philippaerts, R.M. (2008). Talent identification and development programmes in sport: current models and future directions. Sports Medicine, 38(9), 703-714.
2. Cohen, J. (Ed.). (1988). Statistical power analysis for the behavioral sciences (2nd ed.). Hillsdale, NJ: Lawrence Earlbaum Associates.
Esker onak
Ikerketa hau Eusko Jaurlaritzako laguntzarekin partzialki finantzatua izan da (BFI2010-35/IT700-13)
Azken Berriak
Solasaldia Elgoibarren apirilaren 1ean: Osakidetza eta euskara
"Ikerketa-sareak sustatzea da Pediatria Topaketen helburuetako bat"
