Helburuak

Lan honen helburua unibertsitateko ikasleen autokontzeptu fisikoa hobetzeko esku-hartze kognitibo baten efikazia konprobatzea da.

Metodoak

Talde esperimentalean Jarduera Fisikoaren eta Kirolaren Zientzien Fakultateko lehenengo mailako 45 ikasle hartu zuten parte (X=18.80 urte, SD=1.455) eta kontrol taldean laugarren mailako 41 ikasle (X=21.73 urte, SD=1.162). Laginaren 74.4% gizonezkoak izan ziren eta 25.6% emakumezkoak.
Autokontzeptu Fisikoa neurtzeko Autokontzeptu Fisikoaren Itaunketa –AFI– (Esnaola eta Zulaika, 2009) erabili zen, esku-hartzearen aurretik eta ostean.

Esku-hartze kognitiborako, “Pozik zure itxurarekin?” programa erabili zen..

Emaitzak

Esku-hartu ondoren talde esperimentalaren batez besteko puntuazioak modu esanguratsuan handitu ziren, bai autokontzeptu fisiko orokorraren eskalan, bai itaunketaren beste azpi-eskaletan ere: sasoia, erakarpen fisikoa eta indarra. Kontrol taldearen puntuazioetan ez zen aldaketa esanguratsurik nabaritu.

Ondorioak

Esku hartu aurretik kontrol taldearen puntuazioak autokontzeptu fisiko orokorrean eta horren azpi-eskaletan handiagoak ziren talde esperimentalean baino. Honen arrazoia jarduera fisikoan zuten esperientzia eta entrenamendu handiagoa izan zitekeen.
Hala ere, esku-hartze kognitiboa aurrera eraman ondoren, talde esperimentaleko ikasleen puntuazioak autokontzeptu fisikoan handitu ziren, kontrol taldean gertatu ez zen bezala. Talde esperimentalaren gertatutako hobekuntza, beraz, esku-hartze kognitiboaren ondorio izan zitekeen. Hobekuntza hau esku-hartze kognitiboaren efikaziaren erakusle litzateke, beti ere esku-hartze hori jarduera fisiko ohikoarekin konbinatuz.

Bibliografia

Esnaola, I., & Zulaika, L.M. (2009). Physical activity and physical self-concept in a simple of middle-age basque adults. Perceptual and Motor Skills, 108, 479 – 490.

Tayama, J., Yamasaki, H., Tamai, M., Hayashida, M., Shirabe, S., Nishiura, K., & Hamaguchi, T. (2012). Effect of baseline self-efficacy on physical activity and psychological stress after a one-week pedometer intervention. Perceptual and Motor Skills, 114(2), 407-418.

OHARRA: Lan hau Eusko Jaurlaritzak onartutako Ikerketa talde kontsolidatuaren jarduera barruan gauzatu da (IT701-13), eta aldi berean, MICINek emandako diru-laguntzaren EDU2009-10102 (EDUC azpiprograma) barruan kokatzen da “Autoconcepto (multidimensionalidad y estructura jerárquica) y ajuste psicosocial”