25. Osasun Biltzarra: Osasuna eta Kirola
5.4 Lehiaketaren inguruko dieta kategoria desberdinetako emakume futbolariengan
Egileak: IRATI UGALDE ELORRIAGA, SUSANA MARIA GIL OROZKO, JOSE ANTONIO LEKUE, JON IRAZUSTA ASTIAZARAN, LEYRE GRAVINA ALFONSO
0
LEHIAKETAREN INGURUKO DIETA KATEGORIA DESBERDINETAKO EMAKUME FUTBOLARIENGAN
Sarrera
Futbola intentsitate altuko jarduera fisikoa eta jarduera moderatuko ekintzak txandakatzen dituen kirola da. Etengabeko intentsitate-aldaketa horiek zenbait aldaketa metaboliko sortarazi ditzakete, besteak beste, min muskularra, estres oxidatiboa, hantura edota lesioak. Era honetan, eguneko gomendioak jarraitzen dituen nutrizio orekatua eta makronutrienteen ahoratze egokia errendimendurako funtsezkoak izan daitezke, ondorengo errekuperazioa ere erraztuz. Elikagaien selekzio egokiak eta ahoratze momentu edo timing aproposak lotura zuzena dute lehiaketan emango den errendimenduarekin.
Helburuak
Beraz, ikerketa honen helburua, elitea (emakumezkoen 1. maila) eta azpi-elitea (emakumezkoen 2. maila) kategoria desberdineko emakumezkoen futbol jokalarien lehiaketaren aurretiko eta ondorengo dieta aztertzea da.
Metodoak
Athletic Clubeko elite taldeko 12k eta azpi-elite taldeko 16 jokalarik hartu zuten parte ikerketan. Jokalarien ahoratze-datuak hiru eguneko nutrizio erregistroan zehaztu ziren; partidaren aurreko eguna, partidaren eguna eta partidaren ondorengo eguna. Jokalariei eguneroko dieta arrunta jarraitzeko gomendatu zitzaien, edozein elikagai, janari zein edari batzearekin batera.
Emaitzak
Emaitzek adierazi dutenez, bai eliteko zein azpi-eliteko taldeek makronutriente eta behar nutrizionalekiko energia osoan gabeziak izan zituzten. Karbohidratoen portzentajeak ahoratzearen ekarpenean erakutsitako datuek eguneko gomendioetara iristen ez direla erakutsi dute, eliteko taldearen kasuan modu esanguratsuan nagusiagoak diren arren. Zuntzari dagokionean eliteko taldeak ahoratze handiagoa egin arren, ez eliteko ezta azpi-eliteko taldeek ere ez dute gomendaturikoa betetzen. Lipidoen (koipeak) kasuan aldiz, kategoria baxuagoko jokalariek gomendioaren gainetik ahoratzen dute. Bestetik, eliteko jokalariek gomendioen baloreak betetzen dituzte. Orokorrean goi-mailako kirolarien dieta egokiagoa izan dela ikus daiteke nahiz eta partidu ondorengo egunean energia jaitsiera nabaria ematen den, behar energetiko argia antzemanez. Gainera, partidaren egunean eta ondorengoan, karbohidratoen kontsumoa eskasagoa erakusten dute bi taldeek, azpi-eliteko taldean nabariagoa izanik. Gainera, gehiegizko koipe eta proteinen ahoratzea ematen da jokalari honengan.
Ondorioak
Laburbilduz, desberdintasun nabariak aurkitu dira elikadura-jarraibideetan eliteko eta azpi-eliteko taldeen artean, goi-mailako futbolariek makronutrienteen ahoratze kontrolatuagoa daramatela baieztatu delarik. Honela, lehiaketaren inguruan nutrizioaren kontrola gomendagarria liteke kirolariaren errendimendu optimo eta errekuperazioan laguntzeko.
Azken Berriak
Solasaldia Elgoibarren apirilaren 1ean: Osakidetza eta euskara
"Ikerketa-sareak sustatzea da Pediatria Topaketen helburuetako bat"
