30. Osasun Biltzarra: Prebentzioa Auzolanean
4.4 EPISIOTOMIAREN PREBENTZIOAN ERABILTZEN DIREN METODO DESBERDINEN ERAGINKORTASUNA: BERRIKUSPEN SISTEMATIKOA
Egileak: Ane Hormaetxe Amarika, Olatz Amundarain Agiriano, Iraia Bidaurrazaga Letona, Iratxe Duñabeitia Usategui
0
Sarrera
Gaur egun ohikoa da erditze momentuan gertatu daitekeen perineoko trauma ekiditeko episiotomia erabiltzea(1). Interbentzio hori ekiditeko fisioterapia arloan hainbat terapia garatu dira: masaje perineala, Kegel ariketak eta EPI-NO gailua, besteak beste(2).
Helburuak
Lan honen helburu nagusia erditze aurreko masaje perinealak, Kegel ariketak eta EPI-NO gailuak episiotomien murrizketan duten eragina aztertzea izan da. Era berean, bigarren mailako helburua terapia hauek erditze osteko minean duten eragina aztertzea izan da.
Metodoak
PEDro eta PubMed data baseetan bilaketa bat egin da eta teknika horien inguruan diharduten entsegu klinikoak bilatu dira. Artikuluei PEDro kalitate eskala pasatu zaie (5/11 gutxieneko puntuaketa).
Emaitzak
Bilaketa egin ostean, berrikuspen sistematikoa egiteko erabiliko diren 8 artikuluak aukeratu dira (5 masaje perinealaren inguruan, 2 EPI-NO gailuaren inguruan eta bat Kegel ariketen inguruan). Artikulu hauetan hainbat parametro aztertu eta konparatu dira: tratamenduaren hasiera, denbora eta egilea; episiotomien murrizketa eta minaren murrizketa, beste batzuen artean. Masaje perineala eta Kegel ariketak episiotomiak murrizteko eraginkorrak izan daitezkeela ikusi da (terapia hauek aztertzen dituzten emaitza adierazgarriak aurkitu ditugu: p<0.001/p=0.03 eta p=0.014). EPI-NO gailuaren inguruan, ordea, emaitza kontraesankorrak aurkitu dira.
Ondorioak
Aztertutako hiru tekniken artean masaje perineala da episiotomien prebentzioan onura gehien eragiten duena. Hala ere, lortutako datuen arabera oraindik ikerketa zehatzagoak behar dira teknika honen erabilgarritasuna bermatzeko.
Bibliografia
1. Jiang H, Qian X, Carroli G, Garner P. Selective versus routine use of episiotomy for vaginal birth, Cochrane Database Syst Rev. 2017.
2. Ducarme G, Pizzoferrato AC, De Tayrac R, et al. Perineal prevention and protection in obstetrics: CNGOF clinical practice guideline, J Gynecol Obstet Hum Reprod. 2018; 48(7):455-460.
Azken Berriak
Ikergazte2025 kongresurako artikuluak bidaltzeko epea urtarrilaren 20an zabalduko dute
Ruben Garcia pediatra euskaltzalea gogoan
