32. Osasun Biltzarra: Osasunaren sustapena guztion ardura
4.5 Odol lagin hemolizatuak: nola interpretatu emaitzak?
Egileak: Noelia López Barba, Beñat de Alba Iriarte, Edurne Bereciartua Urbieta, Maria Asunción Vives Almandoz, David Álvarez Nistal, Adolfo Garrido Chercoles
0
Odol lagin hemolizatuak: nola interpretatu emaitzak?
Sarrera
Odol laginetako hemolisia hematieen desintegrazioaren ondorioa da. Errore preanalitiko ohikoena da. Kasu gehienetan lagina behar bezala ez ateratzeagatik edo manipulatzeagatik gertatzen da. Beraz, odol-ateratzea errepikatuz zuzendu daiteke. Hemolisiak alterazioak eragin ditzake parametro analitiko batzuen determinazioan, bai neurketa-metodoan interferitzeagatik, bai analitoa zuzenean handitu edo txikitzeagatik, hematien barruko analitoa edo likidoa askatzean.
Helburuak
Parametro biokimikoen kuantifikazioan hemolisiaren eragina aztertzea.
Hemolisiak eragindako emaitzen interpretazio egokia erraztea.
Metodoak
Izozte eta desizozte bidez hemolizatu bat prestatu zen, 20 ml odol erabiliz. Hemoglobina (Hb) -kontzentrazioa 10 mg/dL-koa zuen hemolizatu bat lortu zen. Bestalde, serum-pool bat prestatu zen, hemolisi, ikterizia eta lipemiarik gabeko laginak erabiliz. Pool-alikuotak prestatu ziren, hemolizatu-kontzentrazio gero eta handiagoekin. Paraleloan, kontrol alikuotak prestatu ziren poola ur kopuru berarekin diluituz. Interes-parametroak neurtu ziren, hemolisia duten alikuotetan kontroleko alikuotekin alderatuta eta interferentzia-ehunekoa (% Int) kalkulatu zen.
Emaitzak
Potasioan, laktato deshidrogenasan, alanina aminotransferasan, aspartato aminotransferasan, triglizeridoetan eta kolesterolean interferentzia positiboa ikusi zen. Bestetik, fosfatasa alkalinoan, gamma-glutamil transferasan eta T troponinan interferentzia negatiboa hauteman zen. Glukosa, kaltzio eta urean ez zen interferentzia esanguratsurik antzeman.
Ondorioak
Garrantzitsua da hemolisiak emaitza analitikoetan duen eragina ezagutzea, datuen interpretazio egokia egin ahal izateko. Lagin hemolizatuetan, laborategiak interpretazio-iruzkinak gehitzen ditu emaitza interferituen ondoan, hemolisi-mailaren arabera. Batzuetan, hemolisi-maila oso handia denean, emaitza batzuk ez dira ematen. Hori guztia pazientearen osasunean eragin negatiboa izan dezaketen emaitzen interpretazio okerra saihesteko egiten da. Horregatik, funtsezkoa da mediku eskatzaileek interpretazio-iruzkin horiei arreta jartzea eta, beharrezkoa denean, analitika berri bat eskatzea emaitza fidagarriak lortzeko.
Bibliografia
1. Lippi, G. Practical recommendations for managing hemolyzed samples in clinical chemistry testing. Clinical Chemistry and Laboratory Medicine, volumen 56 (5), páginas 718-727. Abril de 2018.
2. Wayne, PA. Clinical and Laboratory Standards Institute. Interference Testing in Clinical Chemistry; Approved Guideline - Second Edition. CLSI document EP07-A2. 2005.
3. Wayne, PA. Clinical and Laboratory Standards Institute. Hemolysis, Icterus, and Lipemia/Turbidity Indices as Indicators of Interference in Clinical Laboratory Analysis; Approved Guideline. CLSI document C56-A. 2012.
Azken Berriak
Sarean dira "Osatuberri" aldizkariko irakurgai berriak
Donostia Ospitalean ere ospatuko dute Euskararen Eguna
